അരീക്കോട്: യു. ജി. സി ധനസഹായത്തോടെ അരീക്കോട് സുല്ലമുസ്സലാം സയൻസ് കോളജിൽ പണി കഴിപ്പിച്ച ഇൻഡോർ സ്റ്റേഡിയത്തിന്റെ ഉദ്ഘാടനം ബുധനാഴ്ച വൈകിട്ട് പാർലമെന്റ് അംഗം രാഹുൽ ഗാന്ധി നിർവഹിക്കും. കോളേജ് സ്ഥിതി ചെയ്യുന്ന വയനാട് മണ്ഡലത്തിലെ പാർലമെന്റ് അംഗം കൂടിയായ രാഹുൽ ഗാന്ധി കോളേജിലെ ഓപ്പൺ എയർ തിയേറ്ററിൽ ക്യാമ്പസ് സമൂഹത്തെ അഭിസംബോധന ചെയ്യുകയും വിദ്യാർത്ഥികളുമായി സംവദിക്കുകയും ചെയ്യും.
കോളേജ് മാനേജരും കാലിക്കറ്റ് സർവകലാശാല സിൻഡിക്കേറ്റ് അംഗവുമായ പ്രൊഫ. എൻ. വി. അബ്ദുറഹിമാൻ അധ്യക്ഷത വഹിക്കും. കോളേജ് പ്രിൻസിപ്പൽ ഡോ. പി. മുഹമ്മദ് ഇല്യാസ്, ഏറനാട് എം. എൽ. എ. പി. കെ. ബഷീർ, അരീക്കോട് ഗ്രാമപഞ്ചായത്ത് പ്രസിഡന്റ് ടി. കെ. ടി. അബ്ദുഹാജി എന്നിവർ സംസാരിക്കും. സമൂഹത്തിന്റെ വിവിധ തുറകളിലുള്ള പ്രത്യേകം ക്ഷണിക്കപ്പെട്ട പ്രമുഖർ ചടങ്ങിൽ സംബന്ധിക്കും. കായികരംഗത്ത് മികവ് തെളിയിച്ച വിദ്യാർഥികളെയും പൂർവ വിദ്യാർഥികളെയും ചടങ്ങിൽ ആദരിക്കും.
യൂണിവേഴ്സിറ്റി ഗ്രാന്റ്സ് കമ്മീഷന്റെ ഭാഗിക ധനസഹായത്തോടെയാണ് ഇൻഡോർ സ്റ്റേഡിയം പണികഴിപ്പിച്ചത്. 1.1 കോടി രൂപയാണ് മൊത്തം നിർമാണചിലവ്.
11000 ചതുരശ്ര അടി വിസ്തീർണമുള്ള അത്യാധുനിക വിവിധോദ്ദേശ ഇൻഡോർ പരിശീലന ഹാളിൽ നാല് ബാഡ്മിന്റൺ കോർട്ടുകളും ഒരു ബാസ്ക്കറ്റ്ബോൾ കോർട്ടും ഒരു വോളിബോൾ കോർട്ടും ഉണ്ട്. വുഡൻ ഫ്ലോറിങ്ങ് പാകിയ കോർട്ടുകൾക്ക് പുറമേ യോഗ, ജിംനാസ്റ്റിക്സ്, ജൂഡോ, വുഷു എന്നിവയും മറ്റു ഇൻഡോർ പ്രവർത്തനങ്ങൾക്കുള്ള സൗകര്യങ്ങളും പുതിയ സ്റ്റേഡിയത്തിലുണ്ട്. ബുധനാഴ്ച വൈകിട്ട് 3.45 മുതൽ നടക്കുന്ന പരിപാടിയിലേക്ക് രാഹുൽ ഗാന്ധിയെ വരവേൽക്കാൻ കോളേജ് ഒരുങ്ങിക്കഴിഞ്ഞു.